Thaçi dërgon në Gjykatë Kushtetuese masat e Kurtit për kufizim të lëvizjeve

Presidenti i Kosovës Hashim Thaçi dërgoi të martën në Gjykatën Kushtetuese masat e kufizimit të lëvizjes të marra nga qeveria e Albin Kurtit.

Të hënën qeveria vendosi të kufizojë lëvizjet – nga ora 10:00-16:00 dhe nga ora 20:00-6:00 – si masë parandaluese të përhapjes së koronavirusit.

Nga kufizimi i lëvizjeve bëjnë përjashtim furnitorët e dyqaneve, farmacive dhe punonjësit e policisë, ushtrisë, shërbimeve shëndetësore dhe sociale.

Por Presidenti Thaçi i cilësoi këto masa në shkelje të Kushtetutës, pasi kufizimi i lëvizjes bëhet vetëm nën gjendje të jashtëzakonshme. Për këtë ai u bëri thirrje qytetarëve të mos i zbatojnë oraret.

Të martën Presidenti i dërgoi masat në Gjykatën Kushtetuese, e cila u shpreh se do ta shqyrtonte çështjen me përparësi.

Thaçi theksoi se institucionet, policia dhe qytetarët nuk duhet t’i zbatojnë këto masa.

Qeveria Kurti është përgjigjur se masat janë vendosur sipas ligjit për parandalimin dhe luftimin e sëmundjeve ngjitëse, që parashikon aplikimin e masave të tilla në zonat ku është përhapur sëmundja.

Sidoqoftë masat i ka kundërshtuar edhe partia e koalicionit qeveritar Lidhja Demokratike e Kosovës (LDK) dhe opozita – Partia Demokratike e Kosovës dhe Aleanca për Ardhmërinë e Kosovës – të cilat ka kërkuar që ato të miratohen në parlament.

Kosova deklaroi më 17 mars gjendjen e emergjencës së shëndetit publik, ndërsa Presidenti Thaçi i kërkoi Parlamentit vendosjen e gjendjes së jashtëzakonshme, gjendje e cila i atribuon atij më shumë kompetenca për të menaxhuar situatën.

Kryeministri Kurti kundërshtoi kërkesën e Thaçit, por LDK e mbështeti. Kjo situatë vjen pasi Kurti shkarkoi pak ditë më parë Ministrin e Brendshëm – të LDK-së – duke nxitur një krizë politike, pasi prej shkarkimit është nxitur mocion mosbesimi ndaj qeverisë.

Pas kësaj situate ambasadorët e SHBA-ve, Francës, Gjermanisë, Italisë dhe Britanisë së Madhe në Kosovë i kanë kërkuar palëve politike të fokusohen tek lufta kundër koronavirusit dhe jo tek luftrat politike.

Në Kosovë, deri sot janë diagnostikuar 61 persona me koronavirus, prej së cilëve 1 ka vdekur.

Check Also

Koçi në SPAK: Bota e krimit në Fier, lidhje të konsoliduar me politikën, zyrtarëve u dhëmbi deklarata ime

Ish-zv.Ministri i Mbrojtjes, aktualisht kryetar i emëruar i PS-së për Fierin, Petro Koçi, dëshmoi për …

Koronavirusi në Shqipëri: Asnjë humbje jete, 2760 testime, 16 raste të reja

Ministria e Shëndetësisë njoftoi se në 24 orët e fundit nga 2760 testime të kryera, …

Si po përgjohen nga SPAK rastet e dyshuara? 2576 CD dhe mbi 7 mijë DVD për t’u zbardhur, zyrtari i lartë tregon detajet

Korriku ishte padyshim një moment show force e SPAK që tregoi se po bëhet gati …

Lini një Përgjigje

Adresa juaj email s’do të bëhet publike. Fushat e domosdoshme janë shënuar me një *